o jæja það birtir nú alltaf..

Þó að manni finnist það ekki endilega að vera að gerast nákæmlega þá stundina.

Eftir að hafa vorkennt sjálfri mér þessi ósköp, lagðist ég upp í rúm og sofnaði, horfði síðan á nýustu Harry Potter myndina og át súkkulaði og drakk kók ( ekki gaman að stíga á vigtina á mánudag) en mér líður betur núna fór í sund gær synti einn og hálfan km,  veitti einhverju af þessari depurð minni útrás og var bara helv.. góð í morgun, sem minn elskulegi eiginmaður nýtti sér náttla, rak mig út ( sko hér um bil á náttfötunum) til að dæma lifendur og dauða ( minka) snúa við spjöldunum hjá P dýrunum ( p þýðir pels sem þýðir að þeir eiga að verða voooooða fallegir pelsar fyrir einhverja fína frú) svo er ég líka búin að fara út að labba, þannig að ég er í góðum gír. Og þokkalega vel stemmd fyrir helgina.

Takk fyrir öll góðu skilaboðin ( í dag er dagur íslenskrar tungu og ég tala og skrifa bara á íslensku)mér þykir mjög vænt um þau og það er gott að vita af einhverjum sem hugsar til mín. Knús

Tómarúm

Ég er í einhverskonar tómarúmi þar sem ég veit að þetta er ekki eðlilegt ástand en mig langar bara ekki að gera neitt í því.  Ég veit að ég á að fara út að labba, taka til, læra og allt það en mig langar bara alls ekki til þess og geri það því ekki.  Í dag ætla ég í sjúkraþjálfun, þarf eiginlega ekki að fara í skólann svo ég ætla að sleppa því, ég er eiginlega búin að ákveða að liggja í rúminu í dag og annað hvort lesa, sofa eða glápa á sjónvarpið.  Ég geri mér fulla grein fyrir því hversu óhollt þetta er en mér er eiginlega alveg sama.

Það er kannski verst við þennan sjúkdóm er að þegar hann er virkur verður mér alveg nákvæmlega sama um allt og alla.  Mér væri sama þótt ég væri ein á eyðieyju, því að þá væri enginn að setja neina pressu á mig.  Það er í raun enginn að því, mér finnst bara eins og ég eigi ekki að vera svona eigingjörn og að ég eigi að gera eitthvað annað en að vorkenna sjálfri mér. 

Í gær fór ég í skólann hjá stelpunum, það var hátíð hjá þeim í tilfefni af 200 ára afmæli Jónasar Hallgrímssonar, krakkarnir lásu upp ljóð og sungu, foreldrar gátu keypt sér kakó og kleinur og pönnukökur rosa flott og gaman.

Jæja ætla að fara í sjúkraþjálfun og vona að dagurinn á morgun verði skárri.

Hafið það sem best

Niðurdýfa á leiðinni

Eitthvað er ég nú að síga niður á við.  Er þreytt, vil helst bara fara heim og kúra undir sæng og er almennt ekkert rosalega hress.

En það er merkilegt samt að í gær fékk ég 10 í spænsku prófi og er náttla í skýjunum yfir því eða var frekar því að þegar mér líður svona finnst mér þetta ekkert rosalega merkilegt.

Maðurinn minn ber orðið meira skynbragð á því hvernig mér líður en ég, því að í gær fannst ég mér bara vera þreytt og fór því snemma í rúmið, en hann spurði hvort það væri ekki allt í lagi, jú svaraði ég því að mér fannst bara allt í góðu en er að átta mig á að það er það ekki alveg.

Best að reyna að gera sitt besta til að spyrna á móti og fara út að labba og svo er fundur í kvöld þannig að kannski verð ég bara miklu betri á morgun

Hafið það sem best....

Þegar hugurinn reikar...

Stundum, eða oft leitar hugurinn til verri tíma og þá rifjar maður upp allskonar hluti sem engin man eftir nema maður sjálfur.  Ég er mjög dugleg við þetta, (ef dugnað má kalla), ég er að rifja upp hluti  sem gerðust kannski þegar ég var 9 ára og dauðskammast mín fyrir þá, fæ öran hjartslátt og svitna og segi yfirleitt við sjálfa mig: " Oh þú ert svo heimsk" en núorðið er ég hætt að trúa því að ég sé svona heimsk og segi til baka ég er ekkert heimsk, kannski er ég farin að rífast við sjálfa mig á fullu og ÉG vinn yfirleitt.  Það er merkilegt hvað eldgamlar hugsanir geta gagntekið mann og maður hugsar ekki um annað í einhvern tíma og svo gleymast þær aftur og liggja í láginni í langan tíma þar til þær láta á sér kræla á ný.

Ég væri alveg til í að fara í minnisendurvinnslu, svona þar sem allar gagnslausar minningar yrðu teknar og settar í endurvinnslu og þeim annað hvort breytt í fallegar og skemmtilegar hugsanir eða þeim bara eytt, því að sumar hugsanir eru bara hreinlega eitraðar og ekki beint umhverfisvænar

Ég er markvisst að reyna að hugsa jákvætt um sjálfa mig, það er reyndar meira en að segja það, því að það er erfitt breyta áratugalangri ( þegar maður er farinn að telja í áratugum, er maður þá nokkuð mjög gamall??)sýn á sjálfan sig.  Í stað þess að segja við sjálfa mig þegar ég fæ 7 á prófi:"Af hverju fékk ég ekki 8" og þegar ég fæ 8 " af hverju fékk ég ekki 9?"  er ég farin að segja sko 2 í plús ( miðað við að þurfa 5 til að ná) ég fékk tveimur meira en ég þurfti, frábært.  Ég er alltof kröfuhörð við sjálfa mig,  ég er með ofvirka samvisku, mér finnst ég bera ábyrgð á að þessir fundir t.d. séu góðir, að allir fari í góðum málum og er síðan að hugsa um alla vikuna hvernig hinir hafi það, hvort að þetta eða þetta hafi lagast og svo framveigis. Én eins og ég er alltaf að segja: " Maður ber bara ábyrgð á eigin heilsu og það getur enginn gert það fyrir þig"

Kannski ætti ég nú bara að fara eftir því sjálf

En ég fer núna alltaf út að labba  og er miklu orkumeiri og hressari og vonandi fer vigtin að segja eitthvað skemmtilegt líka

Knús á línuna

Labbi labb

Jæja dröslaðist loksins út að labba, frábært veður, bjart, svalt og lygnt.  Fylltist alveg þvílíkri orku og búin að vera að taka til síðan ég kom inn.

Er núna mikið að skoða jólatónleika og svoleiðis, langar á Frostrósirnar en ódýrasti miðinn er á tæpar sex þúsund,  það slyppi kannski ef að ég færi bara ein, en stelpunum langar þannig að fyrir okkur fjögur yrði það tuttugu og fjögur þúsund fyrir okkur fjögur bilun.

En ég fer bara í Skálholt, eins og venjulega það er yfirleitt mjög hátíðlegt og fallegt.

Hef þetta gott að sinni.

Samviskubit...

Steingeit: Þú átt skilið það besta. Ef þú reynir, geturðu skilið í sundur góðu tækifærin frá þeim sem þú hagnast bara lítillega af. Leyfðu vini að ráða för í kvöld.

 Ég er búin að vera að hugsa um hvað ég hef það rosalega gott, eiginlega allt of gott.  Lífið leikur við mig, ég fæ allt sem mig langar í og geri allt sem mig langar til ( innan skynsamlegra marka).  Þegar allt er svona gott hjá mér, fer ég ósjálfrátt að hugsa um alla þá sem ekki eru jafnheppnir, geta ekki leyft sér neitt, þurfa að halda fast  um budduna.

En ég held bara að ég eigi þetta alveg skilið, ég hef þurft að berjast fyrir þessu lífi mínu í dag, bæði fjárhagslega og andlega.  Kannski er þetta púkinn á öxlinni að tala því að það gengur allt svo vel núna með heilsuna, skólann og heimilið og púkinn minn þolir það ekki þegar mér líður vel.

Læt þetta gott heita, hafið það sem best.

Jamm og jæja

Hafið þið gert ykkur grein fyrir því að það eru BARA 55 dagar til jóla!  En það er nú alveg nógur tími til að gera það sem gera þarf, eina sem er leiðinlegt við þetta allt saman eru auglýsingarnar og allt jóladótið sem er að koma núna í búðirnar, væri ekki alveg í lagi að bíða fram í miðjan nóv?  Maður verður eiginlega hálfleiður á þessu öllu loksins þegar jólin koma,  maður er voða spenntur fyrst en síðan verður þetta leiðingjarnt.  En það mætti kveikja á ljósunum núna, þegar allt er orðið svo dimmt og drungalegt, kannski bara þeim hvítu?

En Örvar minn kom heim í gær frá Noregi og færði okkur nammi og dvd diska, footlose og dirty dancing, það verður farið í smá eitís kast einhvert kvöldið, hann meira að segja færði systrum sínum bangsa og nammi,  hann er nú svo ljúfur þessi elska.

Jæja það er fundur í kvöld og ég hvet alla til að mæta sem vantar að spjalla við einhvern um allt á milli himins og jarðar.  Í vikunni sagði mér einstaklingur að hann lifði enn á fundinum síðast og það gerði mig mjög ánægða, því að ég er nú þannig að ég efast í sífellu um mig, svo að svona komment hjálpa mér mikið.

Knús á línuna

Kalt en bjart

Jamm nú er kominn vetur, frost og hvít jörð.  Mér finnst þetta miklu betra en rigningin og dimman.  Það verður allt miklu bjartara og fallegra.  Það er nú reyndar svo að það er allt svo blautt ennþá að það er ómögulegt að fara út að ganga, en þá verður maður bara að fara á skíðatækið, en það getur svo sem verið frekar leiðingjarnt til lengdar.  En vonandi frýs bara nóg til að jörðin harðni, en frekar litlar líkur á því, held að það eigi að fara að rigna bráðum.

Ég er komin á glænýjan bíl með öllum græjum, maðurinn minn fór með gamla bílinn minn í skoðun og þess háttar en álpaðist inn í Heklu og sá þar Skóda með öllum græjum og hélt bara að mig langaði í nýjan bíl sem mig langaði auðvitað.

Það er allt gott að frétta hér, höfum það bara gott fyrir utan kvef og hósta.  Vetrarfríið er búið að vera gott, þetta var bara  nauðsynlegt, ég finn það núna.  Svo er bara mánuður eftir af skólanum, en svo tek ég tvö próf og þau eru endilega með þeim síðustu, þann 10 og 12 des en jæja þau eru nú bara tvö.

En hafið það sem best.

Hrósið..

Fær hún Svandís systir mín,  hún er ein með fimm börn og þar af þrjá unglinga sem eru með gelgjuna á háu stigi, eina prinsessu sem finnst ekkert gaman að vakna, strák sem er í öðrum bekk og hund sem þarf sína athygli.

Ég fór í morgunkaffi til hennar um sjöleytið í morgun ( vaknaði kl 3:30 til að keyra Örvar til keflavíkur í flug) og ekki nóg með það að hún þyrfti að koma öllum af stað þá sló rafmagninu út hjá henni og hún hélt ró sinni, svona persónulega hefði ég nú bara sest niður og farið að skæla.  Hún er hetja og stendur sig roslega vel í því sem hún tekur sér fyrir hendur.

Við sem eigum maka eða einhvern sem hjálpar manni að koma öllum af stað skiljum ekki alltaf hvernig það er að vera einn, hugsum um það í dag hvað við erum heppin og getum verið þakklát fyrir.

Knús á línuna.

Valkvíði

Jæja, nú er komið að því að velja þau fög sem ég ætla að taka á SÍÐUSTU önninni við FSu.  Þegar ég var að byrja þá fannst mér að þetta hlyti að vera eilífðarnám en ég er að KLÁRA.  Reyndar langar mig til að taka svo mörg fög en ætla bara að hafa fimm í töflunni  svo að það er úr vöndu að ráða.  Ég þarf að taka þrjú skyldufög, langar að taka einn áfanga í frönsku, svo ég geti farið til frakklands og svo stendur valið á milli þess að taka einn í sálfræði eða íslensku, báðir áfangarnir spennandi en verð að velja og hafna.

Sjálfshjálparhópurinn hittist í gær og við vorum fimm, við náum vel saman og hlæjum saman og höfum það bara gott.

Þarf að fara að lesa Frankenstein, próf á morgun.

Hafið það sem best.