Náði öllu...

Jæja búin að fá út úr prófunum.... 7 í ísl 503 ( sjálfstætt fólk), 8 í ísl 613, sálfr og ensku, 9 í spænsku.  Nokkuð ánægð bara, alltaf ímynda ég mér verri niðurstöðu og er frekar hissa á þessari því að mér finnst ég aldrei geta neitt.

Smá lægð hérna, ætli hún hafi ekki komið með hinum lægðunum sem stjórna þessu andjólalega veðri hér  Ég væri alveg til í smá snjó og stillur, bjart og fallegt veður í stað þessa mjög svo blauta og hraða logns sem hér ríkir um þessar mundir.  En vonandi gengur þessi lægð hjá mér yfir eins hratt og hinar, ég ætlaði að gera svo margt, en finn enga löngun til að gera neitt.  Sem betur fer á ég duglega dóttur sem bakar fyrir mig og það þarf ekki að þrífa allt vegna þess að það sést ekki neinn skítur í þessu myrkri.

Þetta verður orðið gott á morgun.

Hafið það sem best.

Hugljómun

Það er manneskja sem gerir eitt sem hefur farið alveg gríðarlega í taugarnar á mér frá því að ég hitti hana ( fyrir 15 árum), þetta er manneskja sem ég hef mikil samskipti við og líkar vel við að flestu leyti en þessi  óvani hennar hefur stundum gert mig svo brjálaða að ég hef forðast að hitta hana.  En sumir þroskast seint og ætli ég sé ekki bara ein af þeim, því að það rann upp fyrir mér áðan að í stað þess að ergja mig á þessu ætti ég að sjá spaugilegu hliðina á þessu sem ég og gerði og fannst það bara gaman, manneskjan tekur ekkert eftir því hvernig hún er svo að ég ætla bara að leyfa henni að vera svona án þess að það ergi mig.

Maður getur ekki breytt öðrum en maður getur breytt sjálfum sér.

Hef það bara gott, knús á línuna

Get bara ekki lært meira...

Er búin að eyða helginni í að læra fyrir íslenskupróf á eftir og held bara að ég læri yfir mig ef ég les einn staf í viðbót.  Mikið er ég nú samt fegin að þetta sé eina prófið sem ég tek því að ef ég þyrfti að læra undir mörg myndi ég enda á kleppi eins og stúdentinn í Englum Alheimsins búin að læra yfir mig.

Það er allt að klárast hjá okkur, pelsun og verkun  klárast í vikunni, aldrei verið fyrr búin svo að þetta verður rólegt líf fram að jólum hjá mér, ætla bara slappa af og kannski baka eina smákökutegund sjálf, dæturnar baka hinar, er búin að versla jólagjöfina handa eiginmanninum svo að það er frá.  Við mægurnar fórum í bæinn á föstudaginn og keyptum jólafötin á þær, svo að þær enda ekki í jólakettinum, reyndar vorum ég og eldri dóttirin ekki alltaf sammála um fötin hennar en síðan fundum við mjög fín föt sem við vorum báðar ánægðar með, hið besta mál allt saman.  Það var mun skemmtilegra að skoða föt núna á stelpurnar ( og mig) en undanfarin ár, það var hvorki allt bert á milli laga eða svo aðskorið að tannstöngull hafi varla komist í flíkina.

Ég ætla bara að taka fram vegna umræðu í fjölmiðlum undanfarið þá vil ég að börnin mín fræðist um kristna trú og aðra trú líka og alist upp í kristni og syngi " Ó GUÐ vors lands" og að íslenski fáninn verði áfram með krossi og að allt þetta tuð í siðmennt og vantrú sé mjög yfirborðskennt, ég var að spá í hvort að þau haldi jól? eða einhverjar aðrar kristnar hátíðir hátíðlegar? ef svo er er það ekki bara hrein og klár hræsni?? Pæling

Hætt að tuða..

Hafið það sem best.

 

Jólalög....

Það er merkilegt hvað sum jólalög fara innilega í taugarnar á mér, Last christmas með Wham og Jólahjól eru þau verstu og Ef ég nenni með Helga Björns, ég meina hvað meinar maðurinn??EF ÉG NENNI, meira að segja Trölli sem stal jólunum er meira jólabarn en hann!  Og af hverju þurfa ALLAR útvarpsstöðvar að spila þessi lög? 

Hvert er leiðinlegasta jólalag sem þið hafið heyrt?

Annars er ég mikið jólabarn, þó að sum jólalög fari í taugarnar á mér ég hlakka mjög til að fara að kaupa jólagjarfirnar, það er eitt af því skemmtilegasta sem ég geri, það skemmtilegasta er að horfa á fólkið opna svo gjafirnar sem maður er búin að velja og vonandi sjá gleðisvip á andliti þeirra. 

Jamms, læt þetta duga í bili

KNús á línuna

AÐVENTA.....

Við mæðgurnar skruppum á aðventuhátíð, nutum kórsöngs, lesturs hugvekju og keyptum okkur köku á kökubasar og fórum með heim til að gæða körlunum mínum á.  Bóndinn búinn að setja upp jólaseríur úti  , svo að það er orðið svo fínt hjá mér.

Ég ætla mér að njóta aðventunnar í friði og ró, ekkert að missa mig í bakstri, ég er svo heppin að eldri dóttir mín er svo dugleg að baka, bakaði súkkulaðibitakökur og engiferkökur í gær, meðan ég setti upp jólagardínur í eldhúsið og seríur í gluggana þannig að það er orðið mjög kósí hérna hjá okkur.

Og ég held að smákökurnar endist EKKI fram að jólum, miðað við hvað hefur lækkað í dallinum frá því í gær æ maður fer nú ekki að vera með samviskubit yfir þessu, maður nær þessu bara alveg af sér aftur.

Ég hef það bara ágætt og þarf ekki að tjá mig neitt mikið

 

 

Er þetta nú ekki of mikið?

Kolbrún Halldórsdóttir vill að börnin á fæðingardeildinni séu sett í hvít föt og ekki eigi að kyngreina börnin við fæðingu með því að setja þau í bleikt eða blátt.  Sko þegar ég (fyrir langa löngu) eignaðist mín börn fannst mér miklu skemmtilegra að klæða þau í liti, þó að gult og hvítt væri í boði fannst mér alltaf gaman að klæða þau í bleikt eða blátt, kjól ( stelpurnar frekar en strákinn)og strákinn í gæjaföt.  Mér finnst jafnrétti ekki ógnað með því að klæða börnin okkar í bleikt eða blátt. 

Er maðurinn minn hliðhollari konum þegar hann er í bleikri skyrtu og er hann meiri karlremba þegar hann er í blárri?  Mér finnst þetta vera komið svolítið mikið út í öfgar. 

Fékk 9.29 í lokaeinkunn í spænsku skil reyndar ekkert í því  en þarf þá ekki að taka próf, fegin því.  Einn tími á morgun og munnlegt próf í ensku á föstudaginn og þá er ég búin... í bili..  Ég þarf bara að taka eitt próf 10 des, sem er reyndar frekar stórt, íslenska, þarf að greina ljóð, lesa íslenska bókmenntasögu frá 1900 og til dagsins í dag svo að ég verð að undirbúa mig vel undir það.

En svo er að bara að koma jólaljósunum upp og gera jólakort og eitthvað svoleiðis.. hélt reyndar að ég væri að verða alltof sein að öllu EN það er ekki einu sinni kominn desember!  Fjölmiðlarnir eru búnir að heilaþvo mig í heilan mánuð og mér fannst að jólin hlytu að vera á morgun.  En ég ætla nú bara að slappa af og njóta aðventunnar og þó að ég sé ekki búin að baka 10 sortir og skreyta hátt og lágt verður mín aðventa mjög ljúf, því að núna kvíði ég engu í sambandi við jólahaldið og hlakka bara til.

Jæja læt þetta duga í bili.... knús

 

Hvernig væri að skýra bangsann sinn Jesú?

Hvað ætli fólk myndi segja ef að börnin myndu skíra bangsann sinn Jesú, eða Guð? Ætli foreldrarnir yrðu hýddir á Skólavörðuholtinu eða þau sett í gapastokk? Pæling

Nefndi bangsa eftir spámanninum

Langþráður Laugardagur...

Fór að vinna í morgun, taka skinn niður, Örvar hjálpaði mér helling og við vorum eldfljót að þessu.  Fór síðan í laaaangan göngutúr í blíðviðrinu, fór m.a. að skoða hestana og fleira. 

Sandra bakaði köku og ég vöfflur svo buðum við afa og ömmu í kaffi svo að það var étið rækilega yfir  sig.  Svo er Örvar að setja kótílettur í ofninn og maður á eftir að éta illilega of mikið í dag.

Er nú að hlusta á spænsku fyrir hlustunarpróf, var vinsamlegast beðin um að setja á mig heyrnartól, því að ekki vildu allir læra spænsku með mér skrýtið!

Ætla að reyna að hlusta á meira.....

Hafið það sem best

Andvaka..

Ég er búin að vera vakandi síðan um þrjú að mestu leyti, búin að velta mér fram og til baka, lesa leiðinlegar bækur ( sem eru reyndar ágætar þegar upp er staðið)  Ég gafst up um fimm leytið og er búin að taka til, taka úr uppþvottavélinni, ráða eina krossgátu, lesa Moggann, vafra um á netinu.  Ætla núna að fara að læra fyrir spænskupróf og elda hafragrautinn.

Fundur í kvöld allir, velkomnir sem vilja tala um það sem þeim liggur á hjarta, fólk þarf ekki að vera snargeðveikt til að koma á þessa fundi ( bara smá, það hjálpar)  Nei, nei yfirleitt er þetta nú enginn grátkór, það skiptast á hlátur og grátur því að þetta er vettvangur fyrir hvoru tveggja og ég minni á að það þarf enginn að segja neitt, enda kæmist hann ekki að fyrir mér.

Þekkir einhver sálfræðing eða einhvern aðila sem væri til í koma eina kvöldstund og spjalla smá um jólastress og kvíða og hvernig væri hægt að draga úr þessum einkennum og njóta jólanna?

Mig langar svooo mikið til að hafa svona fyrirlestur því að ég veit að það eru ekki allir jafnspenntir fyrir jólunum og hafa ef til vill þungar áhyggjur af öllu saman.

Jamms farin að læra spænsku. Me llamo Jóna eða eitthvað svoleiðis.

Knús á línuna.

alltaf að græða..

Kjóllinn sem hún systir mín, Svandís, var að prjóna sér, hann passar bara nákvæmlega á mig og Svandís sem kom í heimsókn í sakleysi sínu í gær, fór kjóllaus heim.  Reyndar fékk hún efniskostnað greiddan svo að hún getur prjónað sér annan fimm númerum minni.

Ég er búin að vera að taka til í öllum fötunum sem ég er búin að geyma í hundrað ár eða svo og það eru 4 fullir ruslapokar í skottinu sem ég fer með á morgun í Rauða krossinn, vonandi að einhver geti nýtt sér þetta bara.

Þetta jafnast hér um bil á við að hreinsa sálina, maður verður óskaplega ánægður þegar einhverju svona er lokið, sem maður hefur dregið endalaust og haft yfir höfði sér.

Það eru bara tvær vikur eftir af skólanum, jibbí, ég á reyndar eftir að taka tvö próf eða allavega eitt því að ég er nú hættulega nærri því að þurfa ekki að taka spænskupróf ( krossa fingur)

Ætla að fara hlýða dætrunum yfir fyrir próf.

Hafið það sem best.